Adschüss Partie Lyrics

Et brodelt schon zehn Johr en mir,
hück es dä Daach, do sach ich dir:
Met uns, do es für immer Schluß,
ich trecke wirklich us.
Adschüß Partie, mich sühs de he nit mih.
Ich han für dich em Dreck jewöhlt,
han jestaubsauch un jespölt.
Dä Hungk, dä han ich och jebad,
ich ben doch nit ding Aap.
Adschüß Partie, schöne Mädche jitt et noch mih.
Du wors für mich et jrößte Jlöck,
doch met dä Zick soh ich ding andere Sick.
Ming Liebe hät mich blind jemat un och ding jot Fijur.
Du wors die Frau us mingem Draum, et wor die Liebe pur.
Adschüß Partie, ich kann wirklich nit mih.

Du bes jenausu wie ding Mamm
die hatt bei üch de Botze an.
Du bes noch schlimmer als wie die,
ding Mamm, die moot dich och noch nie
Adschüß Partie, schöne Mädche jitt et noch mih.
Ich ben am Eng, nur noch e Wrack
du jeis mer wirklich voll op d'r ...
(Saach wat denks du eijntlich wä du bes,
du weiß doch janit, wat du aan m'r häs)

Bei aller Liebe, jläuv et mir, ich han de Nas jetz voll,
han nur dat eine Levve, ich ben nit dinge Doll
Adschüß Partie, ich han de Nas jetz voll
Adschüß Partie, de Nas jestreche voll
Adschüß Partie, schöne Mädche jitt et noch mih.